Ulu Öndər Heydər Əliyevin 100 illiyi münasibətilə Sankt-Peterburqda fotosərgi açılmışdır
11 dekabr 2023-cü il tarixində Azərbaycan Respublikasının Sankt-Peterburqdakı Baş konsulluğunun əməkdaşları Azərbaycan xalqının Ümummilli Lideri Heydər Əliyevin əziz xatirəsini anmaq məqsədilə Qoroxovaya küçəsindəki barelyefinin qarşısına toplanıblar. Ulu Öndərin xatirəsini dərin ehtiramla və bir dəqiqəlik sükutla yad edərək, barelyef önünə gül dəstələri qoyublar, xatirə şəkilləri çəkdiriblər.
Eyni gündə Sankt-Peterburqun Qanunvericilik Məclisində Ulu Öndər Heydər Əliyevin anadan olmasının 100 illiyinə həsr olunmuş “В России часть моей души” adlı fotosərginin açılışı baş tutmuşdur.
Sankt-Peterburq və Leninqrad vilayəti üzrə Azərbaycanlıların Milli-Mədəni Muxtariyyətinin təşkilatçılığı və ölkəmizin Sankt-Peterburqdakı Baş konsulluğunun dəstəyi ilə Heydər Əliyevin anadan olmasının 100 illiyi münasibətilə Sankt-Peterburq parlamentində sərgi və xatirə axşamı keçirilib.
Sərginin ekspozisiyasında Ulu Öndərin müasir Azərbaycan dövlətinin qurulmasında, habelə Rusiya-Azərbaycan münasibətlərinin inkişafında rolundan bəhs edən materiallar təqdim edilib. Tədbirdə Sankt-Peterburq Qanunvericilik Məclisinin sədri Aleksandr Belski və parlamentin deputatları, 2011-2018-ci illərdə Sankt-Peterburqun qubernatoru olmuş Georgi Poltavçenko, Azərbaycanın Sankt-Peterburqdakı baş konsulu Sultan Qasımov, Rusiya XİN-in Sankt-Peterburqdakı nümayəndəliyinin rəhbəri Vladimir Zapevalov, Azərbaycan Milli Məclisinin deputatı Nizami Səfərov, Diasporla İş üzrə Dövlət Komitəsi sədrinin müavini Vaqif Seyidbəyov və digər rəsmi şəxslər iştirak ediblər.
Sərginin açılışında çıxış edən Sankt-Peterburq Qanunvericilik Məclisinin sədri Aleksandr Belski qeyd edib ki, sərgi Heydər Əliyevin xatirəsinə dərin ehtiramın əlamətidir. O deyib: “Respublikanın təşəkkül tapması Azərbaycanın Ümummilli Lideri Heydər Əliyevin adı ilə ayrılmaz şəkildə bağlıdır. O, müsbət dəyişikliklərin çox güclü impulsunu verib, xalqına yol göstərib və bütün bunlar Azərbaycanda həyatı dəyişib. Bu gün prezidentlər Vladimir Putin və İlham Əliyev də, xalqlarımız da yanaşı addımlayır, bütün çətinlikləri anlayışla qarşılayır və birlikdə onların həlli yollarını axtarırlar”.
Millətlərarası münasibətlər və miqrasiya siyasətinin reallaşdırılması Komitəsinin sədri Oleq Kapitanov Sankt-Peterburqun qubernatoru Aleksandr Beqlovun tədbir iştirakçılarına müraciətinin mətini oxuyub.
Azərbaycan Milli Məclisinin deputatı Nizami Səfərov Ulu Öndərin Azərbaycanın müasir tarixində, Azərbaycan-Rusiya münasibətlərinin möhkəmləndirilməsində rolundan danışıb. O qeyd edib: “Ümummilli Lider Heydər Əliyev Azərbaycan dövlətçiliyinin memarı, müasir Azərbaycan dövlətinin banisi kimi tarixə düşüb. Ermənistanın təcavüzü nəticəsində yaranmış ağır sosial-iqtisadi vəziyyət, siyasi parçalanma, ciddi ərazi itkiləri fonunda Azərbaycan xalqı bütün ümidlərini Heydər Əliyevə bağlamışdı. Ulu Öndər bu ümidləri parlaq şəkildə doğrultdu. Bu gün Heydər Əliyevin Azərbaycan dövlətçilik konsepsiyası dövlətimizin başçısı İlham Əliyev tərəfindən uğurla həyata keçirilir. Azərbaycanın ərazi bütövlüyünün və suverenliyinin bərpası buna əyani sübutdur”.
Azərbaycanın Sankt-Peterburqdakı baş konsulu Sultan Qasımov Ulu Öndərin Rusiyanın şimal paytaxtında keçirdiyi illərdən bəhs edib, 1949-1950-ci illərdə Heydər Əliyevin Leninqradda SSRİ DTK rəhbərliyinə hazırlıq məktəbində oxuduğunu xatırladıb. Diplomat bildirib ki, 2005-ci ildə Heydər Əliyevin təhsil aldığı binada onun şərəfinə xatirə lövhəsi vurulub. “Rusiyada, o cümlədən Sankt-Peterburqda Azərbaycan xalqının Ümummilli Lideri Heydər Əliyevin xatirəsi böyük ehtiramla yad edilir. “Heydər Əliyev İli” ilə bağlı Sankt-Peterburqda keçirilən tədbirlərin miqyası və səviyyəsi bunun bariz nümunəsidir”, - deyə baş konsul vurğulayıb.
Sankt-Peterburqdakı Azərbaycan diasporunun sədri Vaqif Məmişov Sankt-Peterburqun Qanunverici Məclisində Ulu Öndər Heydər Əliyevin anadan olmasının 100 illiyinə həsr olunmuş tədbirin keçirilməsini əlamətdar hadisə adlandırıb. O əlavə edib: “Heydər Əliyevin xatirəsinə ehtiram əlaməti olaraq bu tarixi binada sərginin açılmasından qürur duyuruq. Biz həmişə qürur hissi ilə qeyd edirik ki, bizim siyasətçimiz, liderimiz, Prezident Heydər Əliyevimiz olub”.
Tədbirdə çıxış edən digər natiqlər Heydər Əliyevin Azərbaycan ilə Rusiya arasında əlaqələrin inkişafında misilsiz xidmətlərindən bəhs ediblər.
Açılış mərasimindən sonra Ümummilli Lider Heydər Əliyevin xatirə axşamı keçirilib, iştirakçılar Ulu Öndərin dövlət xadimi kimi fəaliyyətindən bəhs edən sənədli filmə tamaşa ediblər.
