Azərbaycan Respublikasının xarici işlər naziri Elmar Məmmədyarovun İslam Əməkdaşlıq Təşkilatı Xarici İşlər Nazirləri Şurasının 43-cü Sessiyasında çıxışı

İslam Əməkdaşlıq Təşkilatı Xarici İşlər Nazirləri Şurasının 43-cü Sessiyası

18-19 oktyabr 2016-cı il
Daşkənd, Özbəkistan Respublikası

Azərbaycan Respublikasının xarici işlər naziri
Elmar Məmmədyarovun çıxışı 
Daşkənd, 2016-cı il

Hörmətli cənab Sədr,
Cənab Baş Katib,
Zati-aliləri, xanımlar və cənablar,
İlk öncə, mən Özbəkistan Respublikasının Hökumətinə 43-cü sessiyanı mükəmməl təşkil etdiyinə və nümayəndə heyətimizə yüksək qonaqpərvərlik nümayiş etdirdiyinə görə öz dərin təşəkkürümü bildirmək istərdim. Biz həmçinin Küveyt Dövlətinin Xarici İşlər Nazirləri Şurasının sədri kimi həyata keçirdiyi qüsursuz işləri yüksək təqdir edirik. Fürsətdən istifadə edib, Özbəkistan xalqına Prezident İslam Kərimovun vəfatı ilə əlaqədar səmimi bassağılığımı və dərin təəssüfümü bildirmək istəyirəm.
Hörmətli həmkarlar,
Silahlı münaqişələr, terror aktları, qaçqın və miqrant böhranı, bəzi ölkələrdə dağıdıcı humanitar vəziyyət, din haqqında geniş yayılmış təhriflər və sülh və təhlükəsizlik üçün bir çox digər əngəllər qeyri-möhkəm və kövrək dünyamızda mövcud olmaqda davam edir. Çox təəssüf ki, hazırda bir sıra İƏT Üzv Dövlətləri yuxarıda qeyd olunan problemlər ilə üz-üzədir.
Bugünkü sessiya bu problemlərin mövcudluğunun əsas səbəblərindən birinə - müasir dünyamızda sürətlə güclənən savadsızlıq və cəhalətin artması probleminə müraciət etmək üçün əlverişli fürsət yaradır. Sessiyamızın “Təhsil və Maarifçilik - Sülh və Yaradıcılığa aparan Yol” adlı şüarı sanki bizə xatırladır ki, dünyamızın üzləşdiyi problemlər ilə mübarizədə uğur qazanmaq üçün açar təhsildədir. Təhsil hər bir fərdin, ailənin, icmanın, ölkənin və dünyamızın davamlı inkişafı üçün başlıca hərəkətverici qüvvə, həmçinin zəmanətdir. Təhsil və maarifçilik müsəlmanlar arasında həmrəyliyi gücləndirə, İslamofobiya meyllərinin kökünü kəsə, ekstremizmi dəf edə, tolerantlıq mədəniyyətini təşviq edə və müxtəlif mədəniyyətlər, dinlər və millətləri təmsil edən insanların dinc yanaşı yaşaması üçün əlverişli zəmin yarada bilən əsas qüvvələrdir. Təhsil bəşəriyyətə rifah və firavanlıq gətirir. Və mən İndoneziyanın hörmətli xarici işlər nazirinin qadınlar və qızların təhsil almasının vacibliyinə dair səsləndirdiyi fikir ilə tam razıyam. 
Mən fəxrlə sizə bildirirəm ki, Azərbaycan sülh və təhlükəsizliyin təhsil, elm, mədəniyyət və dialoq vasitəsilə əldə olunduğuna inanan bir ölkə kimi BMT-nin Sivilizasiyalar Alyansının 7-ci Qlobal Forumu, Ümumdünya Mədəniyyətlərarası Dialoq Forumu kimi mədəniyyətlər və sivilizasiyalar dialoqunu möhkəmləndirən beynəlxalq tədbirlərin keçirildiyi mərkəzə çevrilmişdir. Keçən ay biz bütün bəşəriyyəti maraqlandıran çoxsaylı qlobal məsələlərə dair panellərlə birgə aralarında Nobel mükafatı laureatları olan məhşur qonaqların iştirak etdiyi V Bakı Beynəlxalq Humanitar Forumuna ev sahibliyi etmişik. Bundan əlavə, Azərbaycan İslam həmrəyliyini gücləndirmək üçün daim ön sıralarda səy göstərən ölkə kimi gələn il Bakıda 4-cü İslam Həmrəyliyi Oyunlarına ev sahibliyi etməyə layiq görülmüşdür.
Hamıya məlumdur ki, İslam dünya sivilizasiyasına çox böyük töhfələr vermişdir. Tarixin ilk dövrlərindən etibarən müsəlman alimlər astronomiya, fizika, riyaziyyat, tibb, memarlıq kimi müxtəlif sahələrdə hədsiz uğurlar qazanmışlar. Çox təəssüf ki, İslamın gətirdiyi yeniliklər və müsbət təsirləri inkar edərək, beynəlxalq ictimaiyyət İslamofobiya problemini münasib və effektiv şəkildə həll etməkdə aciz qalır. Biz bu qəbuledilməz meylin tezlik və bədnamlığının artmasının qarşısını almaq üçün səylərimizi əsirgəməməliyik. Bu xüsusda, biz İslamofobiya fenomeni ilə mübarizə aparmaq üçün İƏT tərəfindən görülən işləri təqdir edirik və bu təhlükənin qarşısını almaq üçün İƏT çərçivəsində səylərimizi daha da gücləndirməyə çağırırıq.
Biz, hamımız etiraf edirik ki, İslamofobiyanın ortaya çıxmasına töhfə verən ilkin səbəb və faktorlardan biri şübhəsiz ki, zorakı ekstremizm və terrorizmdir. Bu təhlükənin aradan qaldırılmasına yönəlik beynəlxalq əməkdaşlığın gücləndirilməsinə ehtiyac güclü olaraq qalır. Terrordan irəli gələn təhlükə və çağırışların qarşısını səmərəli almaq, eləcə də onun yalnız bununla məhdudlaşmayan əsas səbəblərini- həlli uzanmış hərbi münaqişələr, savadsızlıq və sosial təcridetməni aradan qaldırmaq üçün bütün lazımi tədbirlərin görülməsi zəruridir. 
Yalnız həmrəyliklə birgə və ikiqat səylərimiz günahsız insanların həyatlarını tələf etməkdə davam edən bu qeyri-insani əməlləri aradan qaldıra və qarşısını ala bilər. Azərbaycan güclü və birmənalı şəkildə beynəlxalq sülh və təhlükəsizliyə ən ciddi təhlükələrdən biri kimi - kimə qarşı və harada, eləcə də nə məqsədlə törədilməsindən asılı olmayaraq terrorun bütün forma və təzahürlərini pisləyir.
Mən bir daha Azərbaycanın qardaş Fələstin xalqına sülhün, sabitliyin əldə edilməsi və müstəqil dövlətin yaradılmasında apardıqları mübarizədə tam dəstəyini qeyd etmək istəyirəm. Azərbaycan İsrail-Fələstin münaqişəsinin həllində bu müqəddəs torpaqlarda uzun zamandır gözlənilən, hərtərəfli, uzunmüddətli və yalnız sülh, təhlükəsizlik və davamlı inkişafın əldə edilməsinin yeganə təminatı olan iki dövlət həllinə tərəfdardır. Biz, Fələstin xalqının dəstəklənməsi və amalına xidmət edən İƏT-in gördüyü işləri yüksək səviyyədə təqdir edirik. 
Zati-aliləri,
Hər birinizə yaxşı məlum olduğu kimi, Ermənistan beynəlxalq ictimaiyyətin mövqeyinə tamamilə məhəl qoymadan və beynəlxalq hüququ kobudcasına pozmaqla Ermənistan-Azərbaycan münaqişəsinin həlli üzrə danışıqlar prosesində destruktiv mövqe tutmaqda davam edir. 
Azərbaycan bir daha Ermənistanın təcavüzünü və işğal olunmuş ərazilərdə bədnam etnik təmizləmə ilə Azərbaycan torpaqlarının işğalının qınanılmasında daimi prinsipial mövqeyinə görə İƏT Baş katibinə və üzv dövlətlərə öz səmimi təşəkkürünü çatdırır.
Biz, Ermənistan Respublikasının Azərbaycan Respublikasına qarşı təcavüzü üzrə İƏT Kontakt qrupunun yaradılmasını yüksək qiymətləndiririk. İnanırıq ki, bu Kontakt qrupunun işi müvafiq İƏT və BMT qətnamələrinin həyata keçirilməsinə töhfə verəcək və bu istiqamətdə fərdi və birgə səylərinin uyğunlaşdırılmasına köməklik göstərəcək.
Cənab Sədr,
Nəhayət, bu əhəmiyyətli tədbirə uğurlu müzakirələr arzu edir və İƏT Baş katibi İyad Amin Madani və onun yüksək dərəcədə fədakar komandasına təşkilatımızın məqsəd və prinsiplərinin reallaşdırılmasında göstərdikləri peşəkarlığı yüksək qiymətləndirirəm.

Təşəkkür edirəm!