Sankt-Peterburqda 20 yanvar faciəsinin 32-ci ildönümünə həsr olunmuş sərgi açılmışdır
19 yanvar tarixində 20 Yanvar faciəsinin 32-ci ildönümü ilə əlaqədar Baş konsulluğun və Sankt-Peterburq üzrə Azərbaycanlıların Milli-Mədəni Muxtariyyətinin (AMMM) təşkilatçılığı ilə “Lensovet” mərkəzində ümumxalq hüzn gününə həsr olunmuş sərgi açılmışdır. Tədbirdə Azərbaycan diasporunun üzvləri, Sankt-Peterburq hökumətinin rəsmiləri, buradakı orta və ali təhsil müəssisələrində oxuyan azərbaycanlı və rusiyalı tələbələr, Rusiya Azərbaycanlı Gənclər Birliyinin fəalları və Baş konsulluğun diplomatları iştirak ediblər. Sərginin açılışında 20 Yanvar şəhidlərinin xatirəsi bir dəqiqəlik sükutla, ehtiramla anıldı.
Tədbirdə Baş konsul Sultan Qasımov, AMMM-in sədri Vaqif Məmişov və digər şəxslər çıxış ediblər. Baş konsul Sultan Qasımov çıxışında 1990-cı il yanvarın 19-dan 20-nə keçən gecəni Azərbaycanın müasir tarixinə ən böyük faciələrdən biri, eyni zamanda, xalqımızın qəhrəmanlıq salnaməsinin parlaq səhifəsi kimi daxil olduğunu qeyd etmişdir. Diplomat 20 Yanvar hadisələrinin miqyası, xarakteri və mahiyyəti etibarı ilə görünməmiş cinayət kimi qiymətləndirildiyini tədbir iştirakçılarının diqqətinə çatdırdı. Azərbaycanın Ümummilli Lideri Heydər Əliyevin faciədən bir gün sonra ailə üzvləri ilə birlikdə Azərbaycanın Moskvadakı daimi nümayəndəliyinə gələrək sərt bəyanatla çıxış etdiyini və hadisələrə siyasi qiymət verdiyini vurğuladı. Baş konsul Sultan Qasımov çıxışının davamında məhz Heydər Əliyevin xalqına qarşı sədaqət, mərdlik və dəstək nümayiş etdirərək bu dəhşətli faciə barədə həqiqətləri bütün dünyaya yaydığını xüsusi ilə qeyd etdi. “İndi Azərbaycan Respublikası suveren, müstəqil dövlətdir. 20 Yanvar faciəsi qurbanlarının xatirəsi əbədi olaraq qəlbimizdə yaşayacaq”, - deyə S.Qasımov bildirmişdir.
Baş konsul həmçinin vurğuladı ki, Azərbaycan xalqı verdiyi qurbanlar nəticəsində əldə etdiyi müstəqilliyini dövlət başçısı, Ali Baş Komandan İlham Əliyevin müdrik siyasəti nəticəsində möhkəmlədib, bu gün artıq işğal altında olan tarixi torpaqlarımız azad olunub. Diplomat qeyd etdi ki, Heydər Əliyev siyasətinin uğurlu davamçısı olan cənab Prezident Azərbaycan xalqının və ölkəmizin suverenliyini və qüdrətini beynəlxalq aləmdə bərqərar edib.
Tədbirin davamında çıxış edən Azərbaycanlıların Milli-Mədəni Muxtariyyətinin sədri Vaqif Məmişov Qanlı Yanvar faciəsinin daim Azərbaycanda və xaricdə yaşayan həmvətənlərimizin qəlbində sağalmaz yara olaraq qalacağını bildirib. O gələcək nəsillərin bu ağır tarixi yaddaşı unutmayacağını qeyd edib.
Tədbirin davamında qonaqlar 20 Yanvar faciəsini əks etdirən fotosərgi ilə tanış olublar və açılmış xatirə kitabına ürək sözlərini yazıblar.
