.jpeg)
Azərbaycanın Sankt-Peterburq şəhərindəki Baş konsulluğunun əməkdaşları Leninqradın blokadadan azad olunmasının 77-ci ildönümü münasibətilə keçirilən mərasimdə iştirak ediblər.
Yanvarın 27-də Rusiyanın Sankt-Peterburq şəhərindəki Piskaryov Memorial məzarlığında hökumətin təşkilatçılığı ilə Böyük Vətən müharibəsində Leninqradın blokadadan tam azad olunmasının 77-ci ildönümü münasibətilə mərasim keçirilib.
Mərasimdə baş konsul Sultan Qasımov və konsulluğun əməkdaşları, Sankt-Peterburq hökumətinin nümayəndələri, Rusiya XİN-in Sankt-Peterburqdakı nümayəndəliyinin rəhbərliyi və digər rəsmi şəxslər, xarici ölkələrin bu şəhərdəki baş konsulluqlarının rəhbərləri, diplomatlar, ictimaiyyətin nümayəndələri iştirak ediblər.
Xatırladaq ki, Leninqradın 1941-ci il sentyabrın 8-dən başlanmış blokadası 900 gün davam edib və 1944-cü il yanvarın 27-də şəhər blokadadan tamamilə azad olunub.
Baş konsul Sultan Qasımov blokada zamanı və Leninqrad uğrunda döyüşlərdə həlak olanların xatirəsini ehtiramla yad edib. Diplomat Piskaryov Memorial məzarlığındakı “Ana Vətən” abidəsi qarşısına Azərbaycan Respublikasının Sankt-Peterburqdakı Baş konsulluğu adından gül çələngi qoyub.
Sultan Qasımov və Türkiyə Respublikasının Sankt-Peterburqdakı baş konsulu Mehmet Ferhan Yorulmaz Leninqradın azad edilməsi uğrunda döyüşlərdə həlak olmuş azərbaycanlı döyüşçülərin xatirəsini əbədiləşdirən məzarlıqda quraşdırılmış lövhənin önünə çiçəklər qoyublar.
Anım mərasimindən əvvəl Sankt-Peterburq hökumətinin vitse-qubernatoru Yevgeniy Qriqoryev Azərbaycanın baş konsulu Sultan Qasımov və Türkiyənin baş konsulu Mehmet Ferhan Yorulmaz ilə görüşüb. Görüş zamanı vitse-qubernator Y.Qriqoryev Rusiya, Azərbaycan və Türkiyə dostluğunun bundan sonra da inkişafının vacibliyini xüsusi vurğulayıb.