28 dekabr 2021-ci il tarixində Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinin dəvəti ilə MDB dövlət başçılarının qeyri-rəsmi görüşündə iştirak etmək üçün Sankt-Peterburq şəhərinə səfərə gəlmişdir.
Sankt-Peterburq şəhərinin Pulkovo-2 hava limanında dövlətimizin başçısını Azərbaycan Respublikasının Rusiya Federasiyasındakı səfiri Polad Bülbüloğlu, Azərbaycan Respublikasının Sankt-Peterburqdakı Baş konsulu Sultan Qasımov, Leninqrad vilayətinin qubernatoru Aleksandr Drozdenko, Xarici Əlaqələr komitəsinin sədri Yevgeniy Qriqoryev və digər rəsmi şəxslər qarşılamışlar.
28 dekabr Sankt-Peterburq şəhərində MDB dövlət başçılarının qeyri-rəsmi görüşü keçirilib. Azərbaycan Respublikasının Prezidenti İlham Əliyev görüşdə iştirak etmişdir.
MDB dövlət başçıları birgə foto çəkdirmişlər.
Rusiya Prezidenti Vladimir Putin görüşdə çıxış etmişdir.
Sonra koronavirus pandemiyasına qarşı mübarizə məsələləri ətrafında fikir mübadiləsi aparılmışdır.
Həmin gün MDB dövlət başçılarının qeyri-rəsmi naharında Azərbaycan Respublikasının Prezidenti İlham Əliyev iştirak etmişdir.
Azərbaycan Respublikasının Prezidenti İlham Əliyevin Sankt-Peterburq şəhərinə səfəri dekabrın 28-də başa çatmışdır.
